Listen BIG FM 101.2 MHz LIVE

Breaking News
Home » स्थानीय » अन्तत: प्रदेश ४ को नाम ‘गण्डकी’ बहुमतले पारित, नयाँ शक्तिका २ जना मात्रै विपक्षमा

अन्तत: प्रदेश ४ को नाम ‘गण्डकी’ बहुमतले पारित, नयाँ शक्तिका २ जना मात्रै विपक्षमा

पोखरा- तमुवान सङ्हर्स समितिले पहिचानसहितको गण्डकी तमुवानको माग गर्दै आन्दोलनको गर्ने चेतावनी दिइरहेका बेला अन्तत: प्रदेश ४को नाम गण्डकी प्रदेश सर्वसम्मतिले पारित भएको छ। शुक्रबार बसेको प्रदेश-४ को संसद बैठकमा मतदानपछि बहुमतले पारित भएको हो।

मतदानमा ५६ जना सांसदमध्‍ये मध्ये ५४ जना सांसदले गण्डकी प्रदेशको पक्षमा मत खसालेका थिए। यसको विपक्षमा भने दुई मत परेको थियो।

सुरुदेखि नै विपक्षमा रहेको नयाँ शक्तिले गण्डकी–तमुवान नामाकरण गर्नुपर्ने भन्दै गण्डकीको विरोध गरेको हो । विपक्षमा गरेको प्रश्ताव फिर्ता लिन सभामुखले समय दिएपनि उनले प्रश्ताव फिर्ता लिएनन् ।

शुक्रबारको बैठकमा सभामुख नेत्रनाथ अधिकारी सँगै टेकबहादुर घर्ती अनुपस्थित थिए । संविधानको धारा २९५ (२) मा संसदको दुई तिहाई सांसदबाट प्रदेशको नामाकरण गर्न पाउने ब्यवस्था छ । करिब ९७ प्रतिशत सांसदले गण्डकीको पक्षमा समर्थन जनाएका हुन् ।

गण्डकी नाम तोकिएपछि अव प्रदेशका सबै काम यही नामबाट सञ्चालन हुनेछन् । नाम नतोकिँदा प्रदेशका दैनिक प्रशासनीक काम सहित सभा सञ्चालनमा पनि समस्या भैरहेको थियो ।

गण्डकीको पक्षमा सत्तारुढ दल नेपाल कम्युनिष्ट पार्टी (नेकपा) सहित प्रमुख प्रतिपक्षी दल नेपाली काँग्रेस र जनमोर्चाको समर्थन थियो । प्रदेशसभामा नेकपाका ३९, काँग्रेसको १५, जनमोर्चाको ३ र नयाँ शक्तिको २ मत छ ।

प्रदेशमा मुख्य मन्त्री पृथ्वीसुब्बा गुरुङले सबै जातजाती, भाषा, भुगोललाई समेट्ने गरी प्रदेशको नाम गण्डकी राखेको बताए । संसद सकिए पछि गुरुङले गण्डकी प्रदेश लेखिएको बेलुन उठाएर स्वागत गरे ।

प्रदेश ४ ले यसअघि नै स्थायी राजधानी पोखरालाई तोक्ने निर्णय गरिसकेको छ ।

नयाँ शक्तिको टिप्पणी–प्रदेशबासीका लागि आज ‘कालो दिन’

नयाँ शक्ति पार्टीले प्रदेश नामाकरण भएको दिनलाई कालो दिनको रुपमा टिप्पणी गरेको छ । सांसद हरिशरण आचार्यले जनताको भावना र मर्म विपरित प्रदेशको नामाकरण गरिनु गलत भएको बताए ।

सबैको सम्मान र सहकार्यको लागि इतिहासमा आजको दिन कालो दिन हो । नयाँ शक्तिले घोषणा गरेको छ । राजनीतिक बहुमतका नाममा जनताले आत्मसात गर्न नसक्ने नाम निर्णय भएको उनको भनाई छ ।

‘बहुमतका नाममा निर्णय गर्दैमा सबैले स्वागत गर्छन् भन्ने छैन । यो निर्णय जनताले मान्न तयार छैनन् र आत्मसात गरेका छैनन्, उनले भने–प्रदेश सभाले पनि हिजोको जस्तो एकल जातिय अहंकारबाद देखाएको छ । संघीयता पनि त्यो भन्दा फरक रहेन ।’

प्रदेशसभाले गरेको गलत निर्णयप्रति नयाँ शक्तिले निरन्तर आवाज उठाउने उनी बताउँछन् ।

Check Also

आजबाट पोखरा विमानस्थल ३ बजे पछि १५ दिनका लागि बन्द

पोखरा, २ मंसिर । पोखरा विमानस्थलको धावन मार्ग मर्मतका लागि आइतबार देखी दैनिक १५ घण्टा विमानस्थल बन्द …