बैशाख ४ गते / पूर्वप्रधानमन्त्री एवं संविधानसभाका ज्येष्ठ सदस्य सूर्यबहादुर थापाको शुक्रबार साँझ अन्त्येष्टी गरिएको छ । थापाको धार्मिक विधिअनुसार राजकीय सम्मानका साथ पशुपति आर्यघाटमा दाहसंस्कार गरिएको हो ।
थापाको पार्थिव शरीरमा उनका छोरा एवं वाणिज्य तथा आपूर्ति मन्त्री सुनीलबहादुर थापाले दागबत्ती दिएका थिए । यसअघि राष्ट्रिय प्रजातन्त्र पार्टीका पूर्वअध्यक्ष समेत रहनुभएका स्व थापाको पार्थिव शरीरमा पार्टी अध्यक्ष पशुपति शम्शेर राणा र नेता दीपक बोहराले पार्टीको झन्डा ओढाएर अन्तिम श्रद्धान्जली दिएका थिए ।
स्व. थापाप्रति श्रद्धाञ्जली अर्पण गर्न संविधानसभा अध्यक्ष सुवास नेम्वाङ, उपप्रधानमन्त्री एवम् गृहमन्त्री बामदेव गौतम, पूर्वप्रधानमन्त्री माधवकुमार नेपाल, मधेसी जनअधिकार फोरम नेपाल (लोकतान्त्रिक) का अध्यक्ष विजयकुमार गच्छदार, नेपाली काँग्रेसका नेताद्वय अर्जुननरसिंह केसी र प्रकाशशरण महतलगायत राप्रपाका नेता, कार्यकर्ता पशुपति आर्यघाट पुगेका थिए ।
पाँच पटकसम्म नेपालको प्रधानमन्त्री बन्नुभएका स्व. थापाको सम्मानमा नेपाली सेनाको एक टुकडीले शोक धुन बजाउनुका साथै सलामी अर्पण गरेको थियो । थापाको गत बुधबार राति उपचारका क्रममा भारतको मेदान्त अस्पतालमा निधन भएको थियो ।
