पोखरा। गण्डकी प्रदेशका सामाजिक, विकास, युवा तथा खेलकुद मन्त्री विन्दु कुमार थापाले रिजल्ट आउने गरी काम गर्न कर्मचारीलाई निर्देशन दिएका छन्।
बिहिबार मन्त्रालय मातहतको ११ वटै जिल्लाको सामाजिक विकास कार्यालयहरुको कार्यगत प्रगतिको विषयमा जुममार्फत बुझ्दै मन्त्री थापाले कार्यालयका प्रमुखसँगै मन्त्रालयका कर्मचारीलाई रिजल्ट आउने गरि काम गर्न निर्देशन दिएका हुन्।
“मन्त्रालय मातहतका सबै निकायले गरेका कामहरुको विवरण चाहियो। प्रदेश सरकारको कामलाई जनताले अपनत्व गर्ने गरि काम गर्नुस्। वित्तिय र भौतिक प्रगतिले नागरिकलाई लाभ मिल्नुपर्यो”, उनले भने।
मन्त्री थापाले स्थानीय सरकारसँग समन्वय गर्दै काम गर्न मन्त्रालयका कर्मचारीलाई निर्देशन दिए। प्रदेशसँग जति अधिकार छ, त्यति नै प्रयोग गरि जनताका आकांक्षा पुरा गर्न कर्मचारीलाई उनले भनेका छन्।
“समस्या अवश्य छन् तर त्यसको समाधानको बाटो पनि छ। जति अधिकार छ त्यति नै प्रयोग गरी काम गर्नुस्। जनतालाई सहज हुने बाटोमा आएका समस्यालाई चिर्न म तपाईहरुको साथमा छु।”, उनले भने।
मन्त्री थापाले बेरुजु नआउने गरी काम गर्ने कुरामा जोड दिए। उनले प्रदेश सरकारको समाजिक विकास, युवा तथा खेलकुुद मन्त्रालयका गतिविधिहरुको प्रचारप्रसारमा समेत ध्यान दिन कर्मचारीलाई निर्देशन दिए।
“काम गरेर मात्रै पनि हुँदैन। भएका भौतिक तथा वित्तिय प्रगतिका बारेमा नागरिकलाई जानकारी हुन पर्यो। प्रचारप्रसारमा समेत ख्याल गरौं”, उनले भने। उनले पुरानो धारबाट भन्दा पनि नयाँ शैली अप्नाएर काम गर्न कर्मचारीलाई भनेका छन्।
मन्त्रालयका सचिव राजेन्द्र देव पाण्डेले प्रदेशको महत्वपूर्ण मन्त्रालय सामाजिक विकास, युवा तथा खेलकुुद मन्त्रालय भएको र सन्तोषजनक काम हुने गरि अगाडि बढ्न ११ जिल्लाका सामाजिक विकास कार्यालयका प्रमुखहरुलाई निर्देशन दिए।
आर्थिक वर्षको ६ महिना मात्रै बाँकी भएकाले काम गुुर्नपर्ने आवश्यकतालाई उनले औंल्याए। सामाजिक विकास कार्यालयमा देखिएको कर्मचारी अभावको विषयमा छलफल भइरहेको र त्यसको पूर्ति हुने गरी मन्त्रालय अगाडि बढेको उनले बताए।
उपसचिव तोयानाथ लम्सालले विगत भन्दा वर्तमान अवस्थामा मन्त्रालयको काम अगाडि बढेको उल्लेख गरे। स्थानीय तहसँग साझेदारी मोडलमा काम गर्दै अगाडि बढ्न सामाजिक विकास कार्यालयहरुलाई उनले आग्रह गरे।
प्रदेशको ११ वटै जिल्लाका सामाजिक विकास कार्यालयका प्रमुखहरुले भएको कामको वित्तीय एवम् भौतिक प्रगतिका बारेमा जानकारी गराएका थिए। साथै उनीहरुले काम गर्दै जाँदा देखिएका समस्या खुलाएका थिए।
