पोखरा । ग्रिनहिल युवा क्लबको आयोजनामा कास्कीको माछापुच्छ्रे गाउँपालिका-८ पर्यटकीय ल्वाङगाउँमा जारी ऐतिहासिक ३१ औं चैत्र दशैं मेलामा पुरुष भलिबल अन्तर्गत क्वाटरफाइनलका तीन खेल सम्पन्न भएका छन्।
क्लबका अध्यक्ष सुजन गुरुङका अनुसार युके लण्डन, टी गार्डेन र घाचोक सेमिफाइनलमा प्रवेश गरेका हुन्। युके लण्डनले घाचोक टिम ‘बि’ लाई २-० को सोझो सेटमा पाखा लगाउदै युके लण्डन सेमिफाइनलमा प्रवेश गर्यो।
टी गार्डेनले सिदिङलाई पनि २-० कै सेटमा हराउँदै टि गार्डेन अन्तिम चारमा प्रवेश गर्यो । अब सेमिफाइनलमा टि गार्डेनले युके लण्डनको सामना गर्नेछ। यस्तै अर्को क्वाटरफाइनल खेलमा पञ्चासेलाई घाचोकले २–१ को सेटमा पराजित गर्दै घाचोक पनि सेमिफाइनलमा प्रवेश गर्यो ।
भिचोक र पुलामुखबीचको अन्तिम क्वाटरफाइनलको खेल शुक्रबार हुनेछ। उक्त खेलको विजेता टोलीले सेमिफाइनलमा घाचोकसँग प्रतिस्पर्धा गर्ने खेल संयोजक अनोद गुरुङले जानकारी दिए।
उनका अनुसार यसअघि महिलातर्फ हिमशिखर क्लब धम्पुस र बौद्धसिर्जना क्लब घलेल फाइनलमा प्रवेश गरिसकेको छ। बुधबार बेलुकी लाइभ कन्सर्टतर्फ निष्कर्ष ब्याण्डले प्रस्तुति दिएको थियो।
पुरुषतर्फको विजेता टिमलाई नगद १ लाख १० हजार रुपैयाँसहित शिल्ड, मेडल तथा प्रमाणपत्र प्रदान गरिनेछ।यस्तै उपविजेता टिमलाई नगद ६० हजारसहित शिल्ड, मेडल तथा प्रमाणपत्र प्रदान गरिनेछ।
तृतीय स्थान हाँसिल गर्ने टिमले नगद २० हजारसहित शिल्ड, मेडल तथा प्रमाणपत्र हात पार्नेछ भने, सान्त्वना स्थान हाँसिल गर्ने टिमलाई नगद १० हजारले पुरस्कृत गरिनेछ।
यसैगरी महिलातर्फ प्रथम हुने टिमलाई नगद २० हजार, द्वितीयलाई १० हजारसहित शिल्ड, मेडल तथा प्रमाणत्र प्रदान गरिनेछ।
