काठमाडौं। राष्ट्रिय स्वतन्त्र पार्टी (रास्वपा) नयाँ ढंगले सशक्त बन्दै जाने संकेत देखिएको छ। उपसभापति डा. स्वर्णिम वाग्लेले पार्टीलाई लोकप्रिय र जनप्रिय बनाउने रणनीति अन्तर्गत देशभर चर्चित अनुहारहरूलाई रास्वपामा आबद्ध गराउने प्रयास जारी रहेको बताएका छन्।
डा. वाग्लेले काठमाडौंका मेयर बालेन शाह, धरानका मेयर हर्क साम्पाङ, नेपाल विद्युत प्राधिकरणका कार्यकारी निर्देशक कुलमान घिसिङ र धनगढीका पूर्व मेयर गोपी हमालजस्ता जनताको मन जितेका व्यक्तित्वलाई पार्टीमा भित्र्याउन संवाद र प्रयास भइरहेको खुलासा गरे।
“हामी जनताको भावना बुझेका, निष्ठावान र प्रभावशाली नयाँ पुस्ताका अनुहारहरूसँग सहकार्यको बाटो खोजिरहेका छौं,” वाग्लेले भने, “रास्वपा नयाँ र पुराना अनुहारबीचको स्वस्थ प्रतिस्पर्धाबाट केन्द्र बन्नेछ।”
उनले रास्वपामा युवा पुस्ताको आकर्षण बढिरहेको उल्लेख गर्दै, पार्टीले राजनीति भित्रको पुरानोपन हटाउँदै ‘जनविश्वासको केन्द्र’ बन्ने दाबी पनि गरे।
यसै क्रममा, सभापति रवि लामिछानेसम्बन्धी मुद्दामा उनले चाँडै न्यायिक निष्कर्ष आउने र सभापतिले न्याय पाउनेमा आफू विश्वस्त रहेको बताए।
