पोखरा । लेखनाथ उद्योग वाणिज्य संघले आगामी पुष ३ गतेदेखि १४ गतेसम्म सञ्चालन गर्न लागिएको २१औँ लेखनाथ महोत्सवका लागि स्टल बुकिङ प्रक्रिया औपचारिक रूपमा सुरु गरेको छ। स्टल व्यवस्थापन तथा निर्माण समितिका संयोजक भरत थापाका अनुसार पहिलो चरणमा संघका सदस्यहरूलाई लक्षित गरी मंसिर ८ गतेबाट बुकिङ खुला गरिएको छ, भने अन्य व्यवसायीहरूका लागि दोस्रो चरण मंसिर १५ गतेदेखि सुरु गरिनेछ। यस वर्षको महोत्सवमा विशेषगरी कृषि र स्थानीय उत्पादनलाई प्राथमिकता दिने तयारी भएको समितिले जनाएको छ। स्वदेशी उत्पादनलाई प्रवर्द्धन गर्ने उद्देश्यले ‘मेड इन नेपाल’ कार्यक्रमअन्तर्गत विशिष्ट स्टलहरूको व्यवस्था गरिने संयोजक थापाले बताए।
राष्ट्रिय-अन्तर्राष्ट्रिय सहभागिता
महोत्सवमा राष्ट्रिय तथा अन्तर्राष्ट्रिय स्तरका लघु, घरेलु, साना-ठूला उद्योग तथा व्यापारिक प्रतिष्ठानका वस्तु तथा सेवा, हस्तकला, यातायातका साधन, कृषि तथा पशुजन्य उत्पादन, शिक्षा-विज्ञान सामग्री, सूचना-प्रविधिका नवीन आयामलगायतका थुप्रै प्रदर्शनी रहनेछन्।
संघकी अध्यक्ष एवं महोत्सव संयोजक जानुका पराजुली अधिकारीका अनुसार महोत्सवले स्थानीय उत्पादनको बजार विस्तार, नयाँ प्रविधि र सिप हस्तान्तरण, कला–संस्कृति जगेर्ना, तथा आन्तरिक-बाह्य पर्यटक प्रवर्द्धनमा ठूलो टेवा पुर्याउनेछ।
२०६१ सालदेखि निरन्तरता-अर्थतन्त्र चलायमान बनाउन योगदान
प्रचार–प्रसार समितिका संयोजक ध्रुवबाबु भट्टराईले २०६१ सालदेखि अविरल रूपमा आयोजना हुँदै आएको महोत्सवले हालको चुनौतीपूर्ण आर्थिक अवस्थालाई गतिशील बनाउन महत्वपूर्ण भूमिका खेल्ने विश्वास व्यक्त गरे। उनका अनुसार, उत्पादक र उपभोक्तालाई एकै थलोमा ल्याइने भएकाले आर्थिक गतिविधि बढ्ने, साथै आन्तरिक पर्यटन प्रवर्द्धनमा पनि सहयोग पुग्नेछ।
महोत्सव लेखनाथ उद्योग वाणिज्य संघ र नेपाल उद्योग वाणिज्य महासंघको संयुक्त आयोजना हो। यस वर्षको संस्करणमा **गृहलक्ष्मी ग्यास कम्पनी प्रा.लि.**ले मुख्य प्रायोजकको भूमिका निर्वाह गर्नेछ। त्यसैगरी BLC समूह (नर्भिक अस्पताल, पशुपति बिस्कुट, हेटौडा डेरी) सह–प्रायोजकमा रहेका छन्। महोत्सवको प्रर्वद्धकमा पोखरा महानगरपालिका र नेपाल पर्यटन बोर्ड पनि सहभागी रहेको प्रायोजक व्यवस्थापन उप–समितिका संयोजक विक्रम कर्माचार्यले जानकारी दिए।
