पोखरा । रश्मि आचार्य कास्की क्षेत्र नम्बर २ बाट प्रतिनिधिसभा सदस्यका लागि उम्मेदवार रहेकी नेकपा (एमाले) नेतृले व्यवसायिक तथा प्राविधिक शिक्षालाई आफ्नो मुख्य चुनावी एजेन्डा बनाएका छन्।
शुक्रबार पोखरा महानगरपालिका-४ मा आयोजित मतदाता भेटघाट तथा अन्तरक्रिया कार्यक्रममा बोल्दै आचार्यले हालको शिक्षा प्रणाली अत्यधिक सैद्धान्तिक र कम प्राविधिक भएकाले युवाले सीपअनुसारको रोजगारी पाउन नसकेको उल्लेख गरे। “देशभित्रै रोजगारी सिर्जना गर्न शिक्षा संरचनामा परिवर्तन अनिवार्य छ,” उनले भने।
उनका अनुसार प्राविधिक धारको शिक्षा विस्तार गर्दै युवालाई आत्मनिर्भर र उद्यमशील बनाउनुपर्छ। प्राविधिक शिक्षा हासिल गरेपछि युवा आफैं व्यवसाय गर्न सक्षम हुने वातावरण तयार गर्न ‘स्टार्टअप बिजनेस’ अवधारणालाई वाणिज्य क्षेत्रसँग जोडेर सहुलियतपूर्ण ऋण उपलब्ध गराउनुपर्नेमा उनले जोड दिए।
आचार्यले साना तथा मझौला उद्यमलाई प्रोत्साहन, नयाँ व्यवसाय दर्ता प्रक्रियालाई सहज बनाउने र स्पष्ट रोजगार प्रवर्द्धन नीति निर्माण गर्ने प्रतिबद्धता व्यक्त गरे।
“प्रत्येक परिवार, हरेक समुदाय र संघ-संस्थाले समृद्धिमा योगदान गर्नुपर्छ,” उनले भने, “सन्तुलित र सर्वाङ्गीण विकासमार्फत मात्र समृद्ध समाज निर्माण सम्भव छ।”
