काठमाडौं । मुगुका २५ वर्षीय गणेश नेपालीको मृत्यु प्रकरणमा नेपाल सरकार, काठमाडौं महानगरपालिका र पीडित परिवारबीच आइतबार ९ बुँदे सहमति भएको छ। सहमतिसँगै केही दिनदेखि रोकिएको कानुनी प्रक्रिया अघि बढ्ने भएको छ भने पीडित परिवारले शव बुझ्न पनि सहमति जनाएको छ।वीर अस्पतालको बर्न युनिटमा उपचारका क्रममा असार २६ गते गणेश नेपालीको निधन भएपछि उत्पन्न विवाद समाधानका लागि जिल्ला प्रशासन कार्यालय काठमाडौंमा भएको वार्ताले सहमतिको रूप लिएको हो।
सहमतिअनुसार घटनाको सत्यतथ्य छानबिन गर्न सरकारले पूर्व न्यायाधीशको संयोजकत्वमा स्वतन्त्र छानबिन समिति गठन गर्नेछ। समितिले गठन भएको सात दिनभित्र सरकारलाई प्रतिवेदन बुझाउनेछ। सोही प्रतिवेदनका आधारमा गणेश नेपालीलाई सहिद घोषणा गर्ने विषयमा सरकारले आवश्यक निर्णय लिने सहमति भएको छ।
घटना भएको दिन फिल्डमा खटिएका काठमाडौं महानगरपालिकाका नगर प्रहरीलाई छानबिन नसकिँदासम्म निलम्बन गरिनेछ। यसका लागि जिल्ला प्रशासन कार्यालयले महानगरपालिकालाई औपचारिक पत्राचार गर्नेछ।
पीडित परिवारको भविष्यलाई मध्यनजर गर्दै महानगरपालिकाले मृतककी श्रीमतीलाई योग्यता र क्षमताका आधारमा रोजगारी उपलब्ध गराउने निर्णय गरेको छ। यस्तै, मृतककी छोरीको उच्च शिक्षासम्मको सम्पूर्ण खर्च पनि महानगरले नै व्यहोर्नेछ। राहत रकमको टुंगो भने आगामी कार्यपालिका बैठकबाट लगाइनेछ।
त्यसैगरी, गणेश नेपालीको अन्तिम संस्कार तथा काठमाडौंमा हुने काजक्रियाको सम्पूर्ण व्यवस्थापन महानगरपालिकाले गर्नेछ। शव बुझ्ने, पोस्टमार्टमसहितका कानुनी प्रक्रिया अघि बढाउन सरकारले आवश्यक सहजीकरण गर्ने सहमति पनि भएको छ।
पीडित परिवारका सदस्यको काठमाडौं आवतजावत र बसोबासको खर्च महानगरपालिकाले नै बेहोर्नेछ भने मृतकका एकाघरका परिवारका लागि स्वास्थ्य तथा खाद्य स्वच्छता मन्त्रालयले स्वास्थ्य बिमाको व्यवस्था मिलाउने भएको छ। ‘पीडित परिवारलाई उचित राहत, न्याय र सम्मान सुनिश्चित गर्न सरकार प्रतिबद्ध छ,’ काठमाडौंका प्रमुख जिल्ला अधिकारी ईश्वरराज पौडेलले बताए।
सहमतिपत्रमा सरकारका तर्फबाट प्रमुख जिल्ला अधिकारी ईश्वरराज पौडेल र काठमाडौं महानगरपालिकाका सरोज गुरागाईंले हस्ताक्षर गरेका छन्। पीडित परिवारका तर्फबाट मृतककी श्रीमती एकमाया नेपाली, बुबा चिने नेपाली, आमा सौरी नेपाली, दाजु मदन नेपाली र बहिनी सुन्दरी नेपालीले हस्ताक्षर गरेका छन्। वार्ता टोलीका सदस्यहरू तथा नागरिक प्रतिनिधिहरूले पनि सहमतिपत्रमा हस्ताक्षर गरेका छन्।
सरकार, महानगरपालिका र पीडित परिवारबीच भएको यो सहमतिले गणेश नेपाली मृत्यु प्रकरणको छानबिन प्रक्रिया अघि बढाउनुका साथै पीडित परिवारलाई राहत र न्याय दिलाउने दिशामा महत्वपूर्ण कदमका रूपमा हेरिएको छ।
