पोखरा। गण्डकी प्रदेश सभाको असोज ८ गते बसेको बैठकमा सांसदहरूले शून्य समयमा विभिन्न विषयमा सरकारको ध्यानाकर्षण गराएका छन्। तनहुँको दमैलीदेखि नारायणघाट जाने वैकल्पिक सडक निर्माणका विषयमा सांसद अशोककुमार श्रेष्ठले २० वर्षअघि निर्माण हुन लागेको सडक हालसम्म पूरा नभएको भन्दै चाँडो सम्पन्न गर्न माग गरेका छन्।
सांसद कुशुम बुढा पुनले अस्पताल विकास समितिको गठनसम्बन्धी आदेशबारे असन्तुष्टि जनाउँदै जिल्ला समन्वय समितिको प्रमुखलाई अस्पताल विकास समितिको नेतृत्व दिनु वैज्ञानिक नभएको बताइन्। उनले यस्तो निर्णय पुनरावलोकन गर्न माग गरिन्।
सांसद दमयन्ती रुचालले भारतमा रहस्यमय अवस्थामा मृत्यु भएकी नेपाली विद्यार्थी प्रतिमा लम्सालको घटनामा गम्भीर अनुसन्धान गर्न नेपाल सरकार र प्रदेश सरकारसँग माग गरिन्।
सांसद दीलमाया पौविले अन्तरजातीय प्रेम सम्बन्धका कारण भदौ १७ गते रातिदेखि बेपत्ता भएका बागलुङको निसिखोला गाउँपालिका १ का दिलीपको अवस्था अझै अज्ञात रहेको भन्दै सरकारको ध्यानाकर्षण गराइन्।
सांसद निर्मला थापाले पोखरा भ्रमण वर्ष २०२५ को उद्घाटन समारोहमा नेपालका अर्थमन्त्री र पोखरा महानगरपालिकाका मेयर धनराज आचार्य घाइते भएको घटनाको छानबिन गर्न माग गरिन्।
सांसद भोजराज अर्यालले असार र असोज महिनामा वर्षाका कारण भएको क्षतिको पुनर्निर्माणका लागि सरकारले के कस्ता पहल गरेको छ भन्ने जानकारी माग गरे।
सांसद महेश भट्टराईले अघिल्लो सरकारले सामुदायिक भवन र क्लब निर्माणका लागि विनियोजन गरेको बजेट उपयोग नगरिँदा भवनहरू अपूर्ण अवस्थामा रहेको भन्दै समस्या समाधान गर्न आग्रह गरे।
सांसद मुनिन्द्रजंग गुरुङले मनाङको नासो गाउँपालिका ५ र ६ जोड्ने दूध खोला पुल निर्माण आठ वर्षसम्म पूरा नभएको भन्दै ठेक्का तोडेर नयाँ ठेक्का लगाउन सरकारलाई आग्रह गरे।
सांसद रेशमबहादुर जुग्जालीले निर्माण व्यवसायीहरूले बजेटको अभावमा काम छाड्नुपरेको बताउँदै सरकारको ध्यानाकर्षण गराए।
सांसद बिन्दु पौडेलले त्रिवेणीधामदेखि दुम्किबाससम्मको ८ किलोमिटर सडक अलपत्र परेको भन्दै सरकारले यसलाई कहिले पूरा गर्ने जानकारी गराउन माग गरिन्।
सांसद सीताकुमार सुन्दासले भदौ २२ गतेको अविरल वर्षाका कारण क्षति पुगेको मातृभूमि मावि ४ हरिनास विद्यालयको संरक्षण र व्यवस्थापनका लागि सरकारको ध्यानाकर्षण गराइन्।
सांसद सुशीला सिम्खडाले गोर्खा जिल्लाको मनास्लु क्षेत्रमा होटलहरू बन्द हुँदा पर्यटकहरू फर्कनुपरेको समस्या समाधान गर्न सरकारलाई आग्रह गरिन्।
सांसद श्यामराजा महतले पुल, बाटो तथा अन्य पूर्वाधार योजनाहरूमा ढिलाइ हुँदा श्रमिकहरूले पारिश्रमिक नपाएको भन्दै समस्या समाधानको माग गरे।
सांसद हरिबहादुर भण्डारीले असोज २० गतेको वर्षाका कारण बेनीमा ४० घरधुरीमा क्षति पुगेको बताउँदै पीडित परिवारलाई क्षतिपूर्ति दिन सरकारसँग आग्रह गरे।
गण्डकी प्रदेश सभाको बैठक फागुन २२ गतेका लागि बोलाइएको छ।
