पोखरा । पोखरा महानगरपालिका-१३ स्थित मोहोरियाटोलमा रहेको विन्ध्येश्वरी आदर्श बोर्डिङ स्कुलमा हालै आधारभूत तहका विद्यार्थीहरूबीच नेपाली हिज्जे प्रतियोगिता सम्पन्न भएको छ। प्रतियोगितामा करिब १६ जना विद्यार्थीहरूको सक्रिय सहभागिता रहेको थियो।
रातो सदनतर्फबाट कक्षा ५ का छात्र सखिम बास्तोला, कक्षा ४ का छात्र अंकित मन्ना र छात्रा अनुस्का अधिकारी तथा कक्षा ३ की छात्रा एञ्जिला थापा प्रथम भएका छन्। त्यसैगरी, निलो सदनतर्फबाट कक्षा ५ का छात्रा युनिका खनाल र छात्र सुप्रम थापा, कक्षा ४ का छात्र आयान श्रेष्ठ तथा कक्षा ३ की छात्रा दिपिसा न्यौपाने द्वितीय स्थान हासिल गरेका छन्।
कार्यक्रममा विजयी विद्यार्थीहरूलाई विद्यालयका सह-प्राचार्य नीलकण्ठ पौडेल र लेखा शाखा प्रमुख यमलाल भट्टराईले पुरस्कार तथा प्रमाणपत्र प्रदान गरे। हिज्जे प्रतियोगितामा निर्णायकको भूमिका शिक्षक शर्मिला शर्माले निर्वाह गरेकी थिइन् भने कार्यक्रमको सञ्चालन विद्यालय प्रमुख माया क्षेत्रीले गरेकी थिइन्।
