नयाँ दिल्ली। भारतको राजधानी नयाँ दिल्लीमा सोमबार साँझ ऐतिहासिक लालकिल्ला (Red Fort) नजिकै एक कारमा भएको शक्तिशाली विस्फोटले राजधानी थरथर काँपेको छ। प्रारम्भिक विवरणअनुसार कम्तीमा १० जनाले ज्यान गुमाएका छन् भने २४ जना घाइते भएका छन्।
साँझ करिब ७ बजेको समयमा पार्किङ क्षेत्रमा रहेको कार अचानक विस्फोट हुँदा वरपरका गाडीहरूमा आगलागी भई भीषण धुवाँ फैलिएको थियो। घटनास्थलमा तत्कालै प्रहरी र दमकल परिचालन गरिएको छ भने घाइतेहरूलाई नजिकैका अस्पतालमा उपचारका लागि लगिएको छ।
घटनापछि सम्पूर्ण लालकिल्ला क्षेत्र उच्च सुरक्षा घेरामा लिइएको छ। प्रहरीका अनुसार विस्फोटको कारणबारे पुष्टि हुन बाँकी छ, तर प्रारम्भिक अनुसन्धानले आतङ्ककारी गतिविधि हुन सक्ने संकेत देखाएको बताइएको छ।
साक्षीहरूका भनाइअनुसार विस्फोटको आवाज “भूकम्प जस्तै” लागेको थियो। आसपासका पसलहरूका सिसा फुटेका छन्, सडकमा भगदड मच्चिएको थियो।
यस घटनापछि प्रधानमन्त्री र गृहमन्त्रीले सुरक्षा निकायलाई तत्काल कारबाही र सत्यतथ्य पत्ता लगाउन निर्देशन दिएका छन्। भारतको मुटुमा यस्तो विस्फोटले फेरि एकपटक राजधानीको सुरक्षामा गम्भीर प्रश्न खडा गरेको छ।
