काठमाडौं। सिन्धुली जिल्लाको घ्याङलेख गाउँपालिका-स्थित नेपाल एसबिआई बैंकको शाखामा दिनदहाडै सशस्त्र लुटपाट भएको छ। बैंक लुट्न आएका समूहले प्रतिकार गर्न खोजेका सुरक्षा गार्डमाथि धारिलो हतियार प्रहार गर्दा उनको हात काटिएको छ।
स्थानीय स्रोतका अनुसार खुकुरी प्रयोग गरी आक्रमण गरिएको हो। गम्भीर घाइते भएका सुरक्षा गार्डलाई तत्काल उपचारका लागि अस्पताल लगिएको छ। उनको अवस्था चिन्ताजनक रहेको जनाइएको छ।
प्रत्यक्षदर्शीहरूका अनुसार लुटेराहरूले बैंकभित्र प्रवेश गरी कर्मचारीहरूको हात बाँधेर ठूलो मात्रामा रकम लुटेका थिए। घटना पश्चात लुटेरा समूह फरार भएको र उनीहरूको खोजी तीव्र पारिएको जिल्ला प्रहरीले जनाएको छ।
घटनापछि स्थानीयवासी त्रसित बनेका छन् भने सुरक्षाप्रति गम्भीर प्रश्न उठेका छन्। प्रहरीले घटनाको विस्तृत अनुसन्धान सुरु गरिसकेको र दोषीलाई चाँडै पक्राउ गरिने आश्वासन दिएको छ।
