पोखरा । सुक्खा मौसमसँगै बढ्न सक्ने आगलागी र वन डढेलोको जोखिमलाई मध्यनजर गर्दै जिल्ला विपद् व्यवस्थापन समिति कास्कीले आक्रामक रणनीति अख्तियार गरेको छ । मंगलबार प्रमुख जिल्ला अधिकारी रुद्रादेवी शर्माको अध्यक्षतामा बसेको बैठकले ‘वन डढेलो तथा आगलागी नियन्त्रण कार्ययोजना, २०८२/०८३’ स्वीकृत गर्दै २१ बुँदे महत्त्वपूर्ण निर्णयहरू गरेको हो ।
१. डढेलो रोक्न ‘अग्निरेखा’ र २४ घण्टा हाइअलर्ट
बैठकले वन क्षेत्रमा डढेलो फैलिन नदिन ‘फायर लाइन’ (अग्निरेखा) निर्माण गर्ने र स्थानीय तहहरूले सचेतनामूलक कार्यक्रमसँगै स्वयंसेवक तयारी अवस्थामा राख्नुपर्ने निर्णय गरेको छ । जिल्लाका पाँचवटै स्थानीय तहमा रहेका आपतकालीन कार्यसञ्चालन केन्द्र (LEOC) अब न्यूनतम जनशक्ति र उद्धार सामग्रीसहित २४ सै घण्टा सञ्चालनमा रहनेछन् ।
२. पोखराका अग्ला भवनका लागि अत्याधुनिक प्रविधि
पोखरा बजार क्षेत्रमा बढ्दो सहरीकरण र अग्ला भवनहरूलाई ध्यानमा राख्दै महानगरले नयाँ प्रविधि भित्र्याउने भएको छ । विज्ञ समूहको सुझावअनुसार ६/७ तलासम्म बाहिरैबाट पानीको फोहोरा वा रसायन फालेर आगो निभाउन सक्ने आधुनिक दमकल र प्रविधिको सम्भाव्यता अध्ययन गरी प्रक्रिया अघि बढाइने भएको छ ।
३. जोखिमयुक्त संरचनाको ‘स्क्यानिङ’
समितिले आगामी एक महिनाभित्र जिल्लाभरका जोखिमपूर्ण अवस्थामा रहेका झोलुङ्गे पुल, सडक, सिँचाइ आयोजना र सरकारी तथा निजी भवनहरूको विवरण संकलन गर्न प्राविधिक टोली परिचालन गर्ने निर्णय गरेको छ । सडक र सार्वजनिक स्थल नजिक रहेका जोखिमयुक्त रुखहरूलाई समेत तत्काल व्यवस्थापन गरिनेछ ।
४. हिमपात र पर्यटन सुरक्षा
हिउँदमा उच्च हिमाली क्षेत्रमा हुने हिमपातलाई मध्यनजर गर्दै पर्यटन व्यवसायी र पदयात्रीहरूलाई पूर्वसूचना दिने व्यवस्था मिलाइएको छ । जल तथा मौसम विज्ञान विभागको प्रक्षेपणका आधारमा सुरक्षा निकायमार्फत सचेतना फैलाइनेछ । यस्तै, मनसुन र अन्य विपद्को ‘बहुतहकोपीय पूर्वअनुमान प्रणाली’ स्थापनाका लागि विज्ञबाट अध्ययन गराइने भएको छ ।
५. निर्वाचन लक्षित सडक मर्मत र राहत वितरण
आगामी प्रतिनिधिसभा सदस्य निर्वाचनलाई समेत ध्यानमा राख्दै मतदान केन्द्रसम्म पुग्ने कच्ची सडकको मर्मत र खाल्डाखुल्डी पुर्ने काम तत्काल सुरु गर्न निर्देशन दिइएको छ । यस्तै, विपद् प्रभावित निजी आवास पुनर्निर्माणका लागि लाभग्राहीको प्रमाणीकरण र किस्ता सिफारिस प्रक्रियालाई तीव्रता दिइने निर्णय भएको छ ।
बैठकमा पोखरा महानगरपालिकाका प्रमुख धनराज आचार्य, विभिन्न गाउँपालिकाका अध्यक्षहरू, सुरक्षा निकायका प्रमुखहरू र सरोकारवाला कार्यालयका प्रतिनिधिहरूको उपस्थिति रहेको थियो । माघ २ गते ‘भूकम्प सुरक्षा दिवस’ भव्य रूपमा मनाउने निर्णय गर्दै समितिले विपद् व्यवस्थापनमा कुनै कसुर बाँकी नराख्ने प्रतिबद्धता जनाएको छ ।
