पोखरा । पोखरा उद्योग वाणिज्य संघले बुद्ध विशालबजारका व्यवसायीहरूलाई लक्षित गर्दै भ्याट तथा करसम्बन्धी एकदिने तालिम आयोजना गरेको छ। जर्मन सहयोग संस्था जीआइजेड-आरएसआरएसडीको आर्थिक सहयोग तथा बुद्ध विशालबजार व्यापारिक एसोसियसनसँगको सहकार्यमा तालिम सम्पन्न भएको हो।
तालिममा बुद्ध विशालबजारसहित पोखराका विभिन्न क्षेत्रका करिब ६० जना व्यवसायीहरूको सहभागिता रहेको थियो। कर प्रणाली, भ्याट व्यवस्थापन, कर दाखिला प्रक्रिया तथा सूचना प्रविधिको प्रयोगलगायत विषयमा व्यवसायीहरूलाई व्यवहारिक जानकारी दिइएको थियो।
तालिमको उद्घाटन सत्रमा बोल्दै आन्तरिक राजश्व कार्यालय पोखराका प्रमुख कर अधिकृत शिवप्रसाद ढुंगानाले राज्यले करको नाममा कसैलाई नतर्साउने स्पष्ट पार्दै व्यवसायीहरूले पनि आफ्नो कर दायित्व बुझ्नुपर्ने बताए। नेपालको कर प्रणाली स्वघोषणामा आधारित रहेको उल्लेख गर्दै उनले समयमै कर बुझाउन र उपभोक्ताबाट संकलन गरिएको भ्याट समयमै आन्तरिक राजश्व कार्यालयमा दाखिला गर्न आग्रह गरे।
करसम्बन्धी करिब ८५ प्रतिशत सेवा कागजविहीन प्रणालीबाट सञ्चालन भइरहेको जानकारी दिँदै ढुंगानाले सूचना प्रविधिको प्रयोग गर्न र कर सहयोगीमा मात्र निर्भर नहुन व्यवसायीहरूलाई सुझाव दिए।
कार्यक्रमका अध्यक्ष तथा पोखरा उद्योग वाणिज्य संघका प्रतिनिधि गोकर्ण कार्कीले व्यवसायीहरूले खातापाता चुस्त र दुरुस्त राखेमा अनावश्यक जरिवानाबाट जोगिन सकिने भन्दै करप्रति सचेत हुन आग्रह गरे।
संघकी महासचिव शोभा गौतमको सञ्चालन रहेको कार्यक्रममा बुद्ध विशालबजार व्यापारिक एसोसियसनका मानार्थ सदस्य केशवबहादुर खत्रीले व्यापार–व्यवसाय किन संकुचनमा परेको छ भन्ने विषयमा राज्य गम्भीर बन्नुपर्ने धारणा राखे।
तालिममा चार्टर्ड एकाउन्टेन्ट विवेक श्रेष्ठले प्रशिक्षण दिएका थिए। संघकी कार्यसमिति सदस्य मनोहरि पौडेलका अनुसार आगामी दिनमा आवश्यकता अनुसार अन्य क्षेत्रका व्यवसायीहरूका लागि पनि यस्ता तालिमहरू सञ्चालन गर्ने पोखरा उद्योग वाणिज्य संघको योजना रहेको छ।
