पोखरा । केन्द्रमा नेपाली कांग्रेस र नेकपा (एमाले) बीचको सत्ता सहकार्यमा आएको फेरबदलको प्रभाव गण्डकी प्रदेशमा पनि पर्ने संकेत देखिए पनि प्रदेशस्तरमा भने अहिलेसम्म कुनै औपचारिक निर्णय वा नयाँ संवाद नभएको बताइएको छ।
गण्डकी प्रदेशका कांग्रेस नेताले केन्द्रबाट हालसम्म कुनै ठोस वा आधिकारिक निर्देशन नआएको भन्दै प्रदेशमा एमालेसँगको सहकार्य पुरानै अवस्थामा रहेको बताए। उनका अनुसार केन्द्रमा शीर्ष नेताहरूबीच के छलफल भइरहेको छ भन्ने विषयमा प्रदेश नेतृत्वलाई औपचारिक जानकारी प्राप्त भएको छैन।
उनले कर्णाली र सुदूरपश्चिम प्रदेशमा विकसित पछिल्ला राजनीतिक घटनाक्रमले स्वाभाविक रूपमा केही तनाव सिर्जना गरेको स्वीकार गर्दै अबको रणनीतिबारे छलफल गर्न आफू बिहीबार काठमाडौं जाने जानकारी दिए। पार्टीका शीर्ष नेताहरूसँग परामर्श गरेपछि मात्र गण्डकीको आगामी राजनीतिक बाटो स्पष्ट हुने उनको भनाइ छ।
उनले केन्द्रको निर्णयअनुसार एमालेसँगको सत्ता सहकार्य अन्त्य भए गण्डकीमा पनि नयाँ राजनीतिक समीकरण र वैकल्पिक विकल्पबारे छलफल अघि बढ्ने संकेत दिएका छन्। अहिले भने प्रदेश सरकारको सहकार्य यथावत् रहेको र केन्द्रको निर्णयलाई नै आधार बनाएर आगामी कदम चालिने उनले स्पष्ट पारे।
