पोखरा, २४ फागुन ।
बिग आइकनको छैठौं संस्करणको ग्राण्ड फिनाले भोलि हुँदैछ । पोखरा सभागृहमा बिहान ११ बजेदेखि कार्यक्रम शुरु हुने एफएमले जनाएको छ ।फिनालेमा चर्चित अभिनेत्री करिश्मा मानन्धर विशेष आकर्षण हुने भएकी छन् ।
‘सँधै जस्तो विग आइकनको ग्राण्ड फिनालेमा चर्चित सेलिब्रिटिलाई प्रमुख अतिथीको रुपमा ल्याउने क्रममा यो पटक हामीले अभिनेत्री करिश्मा मानन्धरलाई ल्याउन लागेका हौँ ।’ विग एफएमका कार्यक्रम सँयोजक संजोग बस्यालले जानकारी दिए ।
एफएमले यसअगाडि राजेश हमाल, रेखा थापा, हरिवंश आचार्य, लगाएतका सेलिब्रिटीलाई विग आइकनको प्रमुख अतिथी बनाईसकेको छ । पछिल्लो पटक ‘फागु’ निर्माण गरि चर्चामा रहेकी करिश्मा पनि विग आइकनलाई लिएर निकै उत्साहित छिन् ।
‘देश विदेशमा प्रतिष्ठित रहेको विग आइकनमा मेरो सहभागितालाई लिएर म निकै खुशि छु ।’ करिश्माले भनिन्–‘विग आइकनको भव्य सफलताको पनि कामना गर्दछु ।’ करिश्मा मानन्धर लामो समय यता नेपाली फिल्म उद्योगमा सक्रिय छिन् । फिल्म अभिनयसँगै निर्माणमा पनि हात हालेकी करिश्माको क्रेज अझै पनि निकै राम्रो छ ।
भोलि हुने गायन रियालिटि शो विग आइकनको ग्राण्ड फिनालको तयारी अन्तिम चरणमा पुगेको एफएमले जनाएको छ । विग आइकनको यो सँस्करणमा कुल ४२ जिल्लाका प्रतिभाहरुले सहभागिता जनाएका थिए । ग्राण्ड फिनालेमा यो पटक चार जना भिड्दैछन् । चितवनका साजन आले, बागलुङकी अम्बिका पुन, गोरखाकी अनु गुरुङ र पोखराकी सृष्टि गुरुङ विग आइकनका फाईनलिस्ट हुन् ।
विग आइकन हुनेले १ लाख ७५ हजार रुपैयाँ बराबरको स्कुटर र बेलायतको साँगीतिक भ्रमणको अवसर पुरस्कार स्वरुप प्राप्त गर्नेछन् । त्यस्तै दोस्रो हुनेले ७५ हजार र तेस्रोले ५० हजार रुपैयाँ पुरस्कार स्वरुप प्राप्त गर्ने एफएमले जनाएको छ । विग एफएमले चार जना प्रतिस्पर्धी फाईनलमा पुगेकोले यो पटक सान्तवना पुरस्कारको समेत व्यवस्था गरेको छ ।
