काठमाडौं । शुक्रबारदेखि सुरु हुने दुई दिने लगानी सम्मेलनको सम्पूर्ण तयारी पूरा भएको छ । सरकारले २०७३ सालको सम्मेलनको जगमा उभिएर तेस्रो लगानी सम्मेलनको आयोजना गर्न लागेको हो ।
सम्मेलनबाट आर्थिक समृद्धिको मार्गचित्रका लागि अपेक्षित विदेशी लगानी भित्रने सरकारको विश्वास छ । आज अर्थ मन्त्रालयमा गरिएको पत्रकार सम्मेलनमा अर्थमन्त्री डा.युवराज खतिवडाले सम्मेलनमा कानूनी, प्रशासनिकलगायत सबै विषयमा सरोकारवालाहरुलाई प्रत्यक्ष जानकारी गराइने बताए ।
सरकारका प्रवक्ता एवं संचार तथा सूचना प्रविधि मन्त्रीसहित नेपाल उद्योग वाणिज्य महासंघ, नेपाल उद्योग परिसंघ, नेपाल चेम्बर अफ कमर्सका अध्यक्षहरुलाई साथमा राखेर गरिएको पत्रकार सम्मेलनमा अर्थमन्त्री खतिवडाले सम्मेलनले लगानीका क्षेत्रबारे लगानीकर्तालाई स्पष्ट पार्ने बताए ।
सरकारले लगानी सम्मेलनका लागि ७७ वटा परियोजना छनौट गरेको छ । जसमा ५० वटा सार्वजनिक र बाँकी निजी क्षेत्रका परियोजना छन् । मन्त्री खतिवडाले डुइङ बिजनेश इन्डेक्समा सुधार गर्नुपर्ने रहेको भन्दै यसका लागि विश्व बैंकले दिएको सुधार सुझाव कार्यान्वयन गरिने बताए ।
निजी क्षेत्रले लगानी सम्मेलनलाई सुवर्ण अवसरको रुपमा लिएको भन्दै देशमा लगानीको वातावरण बनिरहेको सन्देश विदेशीलगानीकर्तालाई दिने प्रतिबद्धता व्यक्त गरेका छन् । उनले सम्मेलनमार्फत लगानीकर्तालाई सुरक्षादेखि प्रतिफलको ग्यारेन्टी गरिने बताए ।
सम्मेलनको पहिलो दिन नेपाल सरकारको तर्फबाट लगानीको अवसर तथा लगानी सम्बन्धी नीतिगत सुधारहरुबारे प्रस्तुतिकरण, नेपालमा लगानी गरिरहेका लगानीकर्ताहरुको अनुभव, अन्तराष्ट्रिय लगानीकर्ताहरुको लगानी सम्बन्धी अनुभव सहित सातवटा विषयगत सत्र सञ्चालन हुनेछन् ।
त्यसैगरी सम्मेलनको अन्तिम दिन दुईवटा क्षेत्रगत र तीनवटा प्लेनरी सत्र पनि सञ्चालन हुनेछन् । सरकारले सम्मेलन मार्फत् विश्वका लगानीकर्ताहरुलाई नेपालमा लगानी प्रवद्र्धनका लागि सरकारले लिएका नीतिगत तथा कानुनी प्रयासबारे जानकारी गराउने अर्थमन्त्री खतिवडाले बताए । सम्मेलनमा ४० देशका ६ सय बढी लगानीकर्ता सहभागी हुने लगानी बोर्डले जनाएको छ ।
