चीनबाट फैलिएको कोरोना भाइरस (कोभोड १९) को संक्रमण पाँच दर्जन बढी मुलुकमा फैलिसकेको छ । छिमेकी देशका रुपमा रहेको नेपाललाई विश्व स्वास्थ्य संगठनले नै उच्च जोखिममा राखेको छ । नेपालको पर्यटकीय क्षेत्र पोखरामा पनि कोरोनाबाट बच्ने उपाय अबलम्वन गर्न जरुरी भइसकेको छ । कोरोनाबाट बच्ने उपाय भनेको भाइरसबाट जोगिनु नै हो । नेपाल जस्तो देशमा यसको संक्रमण फैलियो भने के हुन्छ ? कल्पना समेत गर्न सकिदैँन ।
विद्यालयस्तरमा समेत सचेतना फैलाउन सुरु भएको छ । पोखरा महानगरपालिका वडा नं. १५, फलेपाटन स्थित सिद्ध माध्यमिक विद्यालयले अभिभावकलाई सूचना जारी गरेको छ । विद्यार्थी मार्फत घरघरमा कोरोना भाइरसको लक्षण र बच्ने उपाय सहित बिरामी भएका बाबुनानीलाई विद्यालय नपठाउन र विद्यालयमा जानकारी गराउन समेत अनुरोध गरिएको सहप्रधानाध्यापक जुना थापा मगरले जानकारी दिइन् ।
विद्यालयका प्रधानाध्यापक गुरुदत्त कोइरालाले जारी गरेको सूचनामा बालबालिका र अभिभावकहरुमा सतकर्ता अपनाउन अनुरोध गर्दै विद्यार्थीहरुमा १०० डिग्री भन्दा माथि ज्वरो आएमा, श्वास फेर्न गाह्रो भएमा र निरन्तर रुघाखोकी लागेमा विद्यालयमा जानकारी सहित विद्यालयमा नपठाई अस्पताल लगी घरमा नै उचित स्याहार सुसार गरिदिन अनुरोध गरिएको छ ।
