२५ कात्तिक | नेपाली फिल्म नाईकेले प्रचारप्रसारमा अभिनेता आर्यन सिग्देलको नयाँ लुक्स, गेटअपसँगै गीतसंगीतलाई हाईलाईट गरेको छ । साविकभन्दा आर्यनलाई भिन्न गेटअप र लुक्समा प्रस्तुत गरेको फिल्म नाईकेको मंगलबार काठमाण्डौमा भएको पत्रकार सम्मेलनमा पनि यो कुराले निरन्तरता पायो । सबैकुरालाई ओझेलमा पार्दै आर्यनको चर्चा पत्रकार सम्मेलनमा बढि भएको थियो ।
र, सोहि अवसरमा मंसिर १९ गतेबाट प्रदर्शनमा आउन लागेको फिल्म ‘नाइके’को अडियो एल्बम बिमोचन गरिएको छ । फिल्मका कलाकार तथा प्राविधिकको साथमा चलचित्र प्राविधिक संघका अध्यक्ष मनोज केसी, निर्माता सुवास गिरी लगायतले एल्बमको बिमोचन गरेका हुन् ।
नेत्र गुरुङको निर्देशनमा बनेको यो फिल्ममा ताराप्रकाश लिम्बु, रमन गायक, योगेश काजीले संगीत भरेका छन् । फिल्ममा ४ गीत समावेश छन् । जसमा योगेश काजी, मेलिना राई, धमेन्द्र सेवान, नुरजंग गुरुङ र रोशनी अधिकारीको स्वर छ ।
यो फिल्ममा आर्यन सिग्देल शिर्ष भूमिकामा देखिएका छन् । कार्यक्रममा उपस्थित आर्यनले फिल्मको कथा मन परेकाले काम गरेको बताए । आफूलाई एक्सन भूमिकामा गर्न मन लागेको र निर्देशक नेत्र गुरुङले यस्तै कथा सुनाएपछि काम गर्न ईच्छुक भएको आर्यनको तर्क थियो । उनले फिल्मका सबै गीत उत्कृष्ट रहेको बताए ।
आर्यनले यो फिल्ममा एक्सनमा विशेष ध्यान दिएका छन् । उनलाई फिल्ममा सुर्बिना कार्कीले साथ दिएकी छिन् । यस्तै फिल्ममा रेम बिक र बोधराज रेग्मीको पनि मुख्य भूमिका छ । बिष्णु हमाल कार्यकारी निर्माता रहेका फिल्ममा जगदिश खनाल, नारायण खनाल, संगीता पराजुली, आनन्द क्षेत्रीले पनि लगानी गरेका छन् ।
एल्बम बिमोचन कार्यक्रममा फिल्मका संगीतकार रमन गायक, गायक तथा संगीतकार योगेश काजी र गायिका मेलिना राइले गीत गाएर सुनाएका थिए । फिल्मको वितरणको जिम्मा गोपाल कायस्थले लिएका छन् । कायस्थले फिल्म नाइके नाम सुन्ने वित्तिकै आफूले वितरण गर्न अगाडि सरेको बताए । यो फिल्मले आर्यनलाई नयाँ परिचय दिने अपेक्षा गरिएको छ ।
