काठमाडौ, जेष्ठ ५ – परीक्षा नियन्त्रण कार्यालय, सोनोठिमीले २७ केन्द्रका एसएलसीका उत्तरपुस्तिका जाँच भइसकेको जनाएको छ । कार्यालयले दिएको जानकारी अनुसार देशभरमा ६४ उत्तरपुस्तिका परीक्षण केन्द्र छन् । भूकम्पबाट प्रभावित जिल्लामध्ये गोरखा, धादिङ, नुवाकोट, रसुवा र दोलखामा रहेका केन्द्रबाट समेत उत्तरपुस्तिका जाँच भई नियन्त्रण कार्यालयमा आइसकेको परीक्षा नियन्त्रक विष्णुबहादुर द्वारेले मंगलबार ईकान्तिपुरलाई बताए ।
‘सबै जिल्लाका केन्द्रमा निरन्तर उत्तरपुस्तिका जाँच्ने क्रम जारी छ,’ महाभूकम्पबाट केही दिन काम रोकिएपनि त्यसपछि सुचारु रहेको उल्लेख गर्दै नियन्त्रक द्वारेले भने, ‘परीक्षण सकिएर नियन्त्रण कार्यालयमा उत्तरपुस्तिका ल्याउने काम भइरहेको छ ।’
गत चैत १६ गते देशभर एकसाथ सम्पन्न एसएलसी परीक्षामा नियमित र एक्जाम्टेड गरी ५ लाख ७४ हजार २ सय ८५ परीक्षार्थी सहभागी भएका थिए ।
नियमअनुसार परीक्षा सकिएको तीन महिनाभित्र नतिजा सार्वजनिक हुनेपर्ने प्रावधान छ । ‘जसरी हुन्छ तीन महिना भित्र एसएलसीको नतिजा सार्वजनिक हुनेछ,’ नियन्त्रक द्वारेले भने । भूकम्पपछि एसएलसी परीक्षाप्रति अनावश्यक र अनर्गल हल्ला भए प्रति कुनै विद्यार्थी, अभिभावक र शिक्षकहरु भ्रममा नपर्न नियन्त्रकले अनुरोध गरेका छन् ।
