पोखरा । गण्डकी प्रदेशमा बिहीबार एकैदिन १६९ जना कोरोना संक्रमितको थपिएका छन् । यो संख्या एक दिनमा संक्रमण पुष्टि हुनेकोे अहिलेसम्मकै उच्च हो ।
हालसम्म गण्डकी प्रदेशमा कोरोना संक्रमितको संख्या ५ हजार ३५६ पुगेको छ ।
बिहीबार स्वास्थ्य निर्देशनालय गण्डकीले ५ पटकसम्म अध्यावधिक विज्ञप्ति जारी सो बारे जानकारी दिएको हो ।
आज प्रदेशमा सबैभन्दा धेरै नवलपरासी (ब.सु.पू) का ५८ जनामा कोरोना संक्रमण पुष्टि भएको छ ।
यस्तै बाग्लुङका ५१ जना, कास्कीका ३५ जना, तनहुँका ११ जना, गोरखाका ७ जना, म्याग्दीका ४ जना र लमजुङका ३ जनामा कोरोना देखिएको छ ।
निर्देशनालयका अनुसार कास्कीका संक्रमित सबै पोखरा महानगरपालिकाका हुन् ।
यसैगरी बिहीबार प्रदेशमा थप एक कोरोना संक्रमितको मृत्यु पुष्टि भएको छ ।
पोखराको गण्डकी मेडिकल कलेज (जीएमसी) मा उपचाररत तनहुँका कोरोना संक्रमित परुषको मृत्यु भएको हो ।
निर्देशनालयका अनुसार तनहुँ जिल्लाको व्यास नगरपालिका– ३ का ६५ बर्षीय संक्रमित पुरुषको मृत्यु भएको हो ।
अस्पतालको भेन्टिलेटरमा उपचारको क्रममा बुधबार राति ११ः५० बजे उनको मृत्यु भएको निर्देशनालयले जनाएको छ ।
ती पुरुषमा कोरोनाको संक्रमणका साथै मधुमेह र उच्च रक्तचापको समस्या रहेको थियो ।
यससँगै तनहुँमा मात्रै कोरोनाले मृत्यु हुनेको संख्या ९ पुगेको छ ।
हालसम्म गण्डकी प्रदेशमा कोरोनाको संक्रमणबाट मृत्यु हुनेको संख्या ४७ पुगेको छ।
मृत्यु हुनेमा कास्कीका १२, नवलपुरका ९, गोरखाका ७, तनहुँका ९, स्याङ्जाका ५, लमजुङ र बाग्लुङका २/२ तथा म्याग्दीका १ जना छन् ।
त्यस्तै गण्डकीमा आज १८ जना कोरोना संक्रमणमुक्त भई डिस्चार्ज भएका छन् । यससँगै प्रदेशमा कोरोनामुक्त हुनेको संख्या ३ हजार ४८८ पुगेको छ ।
हाल प्रदेशमा १ हजार ८२१ सक्रिय संक्रमित रहेका छन् ।
आज प्रदेशमा ६७३ जनाको पीसीआर परिक्षण भएको र हालसम्म ७९ हजार ३०२ पीसीआर परिक्षण भएको निर्देशनालयले जनाएको छ ।
