पोखरा । नेपाल लोकतान्त्रिक खेलकुद संघको प्रदेश तथा जिल्ला संयोजकहरुको घोषणा पोखरामा हुने भएको छ ।
संघले ७ प्रदेश र ७७ वटै जिल्ला संयोजकहरुको घोषणा माघ २१ गते गर्ने भएको संघका केन्द्रिय अध्यक्ष देवेन्द्र कुमार शेरचनले जानकारी दिए । पूर्व सञ्चारमन्त्री, नेपाली कांग्रेसका केन्द्रिय सदस्य तथा खेलकुद विभाग प्रमुख मोहन बहादुर बस्नेतले संयोजक घोषणा गर्ने कार्यक्रम रहेको उनको भनाई छ । ‘२१ नेपाली कांग्रसको पार्टी कार्यालयमा बिहान ११ बजे संयोजक घोषणा गरिनेछ,’ उनले भने, ‘लामो समय निस्क्रिय रहेको लोकतान्त्रिक खेलकुद संघ अब नयाँ–नयाँ कार्यक्रम लिएर गाउँ–गाउँ जानेछ ।’
सोही दिन प्रदेशमा हुने खेलकुद गतिविधीको पनि जानकारी गराईने छ । जिल्ला संयोजक घोषणा भईसके पछि उनिहरुले नै पालिका र वडा संयोजक घोषणा गर्ने अध्यक्ष शेरचनले जानकारी दिए । खेलकुद क्षेत्रमा भएको विकृति विसंगति हटाउनका लागि लोकतन्त्र प्रेमी खेलाडी हरुलाई समेट्दै २०७१ सालमा लोकतान्त्रिक खेलकुद संघको स्थापना भएको थियो । संघले स्थापना भएदेखि नै खेलकुद क्षेत्रको विकाशमा उल्लेखनिय भूमिका खेल्दै आएको उनको भनाई थियो ।
