पोखरा । नेकपाका प्रचण्ड–माधव समूहले गरेको आम हड्तालको प्रभाव पोखरामा पनि परेको छ ।
आज घोषित आम हड्ताल सफल बनाउन प्रचण्ड–माधव समूहका नेता–कार्यकर्ता पोखराका मुख्यचोक चोकमा तैनाथ भएका छन् भने ठाउँ–ठाउँमा बाक्लो रुपमा सुरक्षाकर्मी परिचालन गरिएको छ ।
बन्दका कारण पोखरामा छोटा तथा लामा दुरीका सार्वजनिक सवारी साधन चल्न सकेको छैन ।
संवैधानिक निकायमा भएको पदाधिकारी नियुक्तिको विरोधमा नेकपा प्रचण्ड–माधव समूहले बिहीबार आम हड्तालको आह्वान गरेको हो ।
यसैबिच, पोखरामा विद्यार्थी संगठन अनेरास्ववीयुले बाइक र्याली निकालेको छ ।
प्रचण्ड–माधव समूहले गरेको आम हड्तालको विरोध गर्दै जनाताका लागि नेपाल सधैं खुल्ला छ भन्ने सन्देश दिनका लागि बाइक र्याली निकालेको संगठनले जनाएको छ ।
पृथ्वीनारायण क्याम्पस गेटबाट सुरु भएको विद्यार्थी संगठनको र्यालीले चिप्लेढुंगा, सभागृहचोक, सिर्जनाचोक, एयरपोर्ट, पृथ्वीचोक, महेन्द्रपुल लगायतका पोखराका मुख्य बजार परिक्रमा गर्नेछ ।
उनीहरुले हाम्रो नेपाल खुल्ला छ, बन्द गर्न पाइदैनलगायतका नारा लगाएका छन् ।
