पोखरा। टिपटप न्यू डायमण्ड स्पोटर्स क्लबलाई हराउँदै आयोजक टोली पोखरामा जारी एनसेल पाँचौं टाइगर कप राष्ट्रिय तथा अन्तर्राष्ट्रिय भलिबल प्रतियोगिताको महिलातर्फ फाइनलमा प्रवेश गरेको छ।
टाइगर ग्रुप अफ पोखरा नेपालको आयोजनामा पोखरा रंगशालामा आज शनिबार भएको दोस्रो क्वालिफायरमा न्यू डायमण्डलाई ३-१ सेटले पराजित गर्दै आयोजक टोलीले फाइलन यात्रा तय गरेको हो।
पहिलो सेट १६-२५ ले गुमाएको आयोजक टाइगर ग्रुपले दोस्रो, तेस्रो र चौथो सेटमा उत्कृष्ट पुनरागमन गर्दै फाइलन यात्रा सुरक्षित गर्यो।
टाइगर ग्रुपले दोस्रो सेट २५-१९, तेस्रो २५-१५ र चौथो सेट २५-२३ ले आफ्नो पक्षमा पार्यो। आयोजक टोलीले अब उपाधिका भोलि सशस्त्र प्रहरी बल एपीएफसँग खेल्नेछ।
पराजित भएको न्यू डायमण्ड तेस्रो बनेको छ। तेस्रो बनेको न्यू डायमण्डले १ लाख ८५ हजार ५५५ रुपैयाँ प्राप्त गर्यो।
अब पुरुषतर्फ दोस्रो क्वालिफायरमा गण्डकी प्रदेश र त्रिभुवन आर्मी क्लबबिच प्रतिष्पर्धा हुनेछ। उक्त खे साढे १ बजेबाट सुरु हुने तालिका छ। यो खेलको विजेताले उपाधिका लागि नेपाल पुलिस क्लबसँग भिड्नेछ।
