पोखरा। महाशिवरात्री पर्व नजिकिदैँ आउँदा देशभरका शिव मन्दिरमा शिवरात्री पर्व मनाउन तयारी सुरु भएको छ। हिन्दु धर्मालम्वीका आराध्यदेव भगवान शिवको पुजा अर्चना गरी शिवरात्री पर्व मनाउने परम्परा छ।
यही फागुन १४ गते परेको महाशिवरात्रीका लागि देशभरका शिव मन्दिरमा सजिसजावट गरी तयारी तीब्र पारिएको बताइएको छ।
शिवरात्री पर्वकै अवसरमा पोखरामा रहेका विभिन्न शिव मन्दिरमा पनि भगवान शिवको महिमा र पर्व मनाउन तयारी सुरु भएका छन्।
पर्वकै अवसरमा लामाचौरस्थित नवआदर्श सामुदायिक विकास समाजले छैटौं संस्करणको शिव दर्शन यात्राको तयारी गरेको छ। यस क्षेत्रलाई धार्मिक क्षेत्रको रुपमा विकास गर्ने उद्धेश्यले विगत ६ वर्षदेखि समाजले यात्रा थालनी गरेको हो।
विभिन्न झाँकी, बाजागाजा र भजन किर्तन सहित हुने यात्राको तयारी अन्तिम चरणमा पुगेको अध्यक्ष दिनेश भण्डारीले जानकारी दिए।
स्थानीय कणेश्वर शिवालयवाट सुरु हुने शिव यात्रा, महेन्द्रेश्वर शिवालय, जलेश्वर शिवालय, सुरथेश्वर शिवालय हुँदै सर्वेश्वर शिवालय मन्दिरमा पुगेर समापन हुने अध्यक्ष भण्डारीले बताए।
विहान ७ बजेदेखि नै यात्रा सुरु हुने र कार्यक्रममा त्यस क्षेत्रका धार्मिक संघ संस्था, ओम शान्ती, आमा समुह, युवा क्लव, भजन समुह तथा टोल विकास संस्थाको सहभागिता रहने बताइएको छ।
नयाँ पुस्तामा धार्मिक जागरण र चेतना ल्याउन यात्रा महत्वपुर्ण हुने समाजले जनाएको छ। यस्तै पोखरा- १९ घार्मीमा रहेको ओमकारेश्वर महादेव मन्दिरमा पनि शिवरात्री पर्वको तयारी तिब्र पारिएको छ।
प्रत्येक वर्ष शिवरात्री पर्वलाई विशेष रुपमा मनाउँदै आएको मन्दिर व्यवस्थापन समितिले बुधवार मन्दिर परिसरमा भजनकिर्तन गरी शिव धुनी जगाएर आराध्यदेव शिवको महिमा प्रस्तुत गरिने समितिका अध्यक्ष ढुण्डिराज पौडेलले जानकारी दिए।
विहानै देखि पवित्र जल,दुध चढाउने कार्य शुरु हुने र यो क्रम दिनभर नै जारी रहने तथा साँझ शिव धुनीमा जल चढाए पछि रातभर भजनकिर्तन गरिने तयारी भएको स्थानीय युवा अर्जुन पौडेलले बताए।
पर्वलाई लक्षित गरी मन्दिर परिसरलाई सजिसजाउ गरिएको छ। धार्मिक पर्यटकीय क्षेत्रको रुपमा रहेको सो स्थलवाट पोखरासहित माछापुच्छ्रे र अन्नपुर्ण हिमश्रृखंलाको दृश्य अवलोकन गर्न सकिन्छ।
