पछिल्लो केही समययता देशभर बिनाजानकारी बिजुली जाने क्रम बढेको छ। संघीय राजधानी काठमाडौंदेखि देशका अन्य भागमा पनि बिजुल आउने-जाने क्रम बढेको गुनासो आइरहेको छ । बिजुली जुनसुकै बेला जाने क्रममा देशमा प्रमुख राजमार्थमा सञ्चालमा रहेका विद्युतीय गाडीलाई पनि असर गरिरहेको छ ।
बिजुली गइरहने समस्याले चार्जिङ स्टेशनमा गाडीको लामो लाइन देखिन थालेको छ । पृथ्वी राजमार्ग र पूर्व-पश्चिम राजमार्गमा गुड्ने विद्युतीय गाडी मारमा पर्न थालेका छन् ।
निजी विद्युतीय सवारीका सञ्चालकलाई पनि लामो यात्रामा निस्किँदा तनाव झेल्नु परेको छ । अहिले देशका उद्योगहरूमा लोडसेडिङ भइरहेको छ ।
यही सन्दर्भमा सरकारले आगामी आर्थिक वर्षको नीति तथा कार्यक्रम ल्याउँदा ऊर्जामन्त्री दीपक खड्का पनि संसद् भवन परिसरमा देखिए ।
उनलाई देख्नेबित्तिकै सञ्चारकर्मीले घेर्न पुगे । संसद् बैठकबाट निस्किरहेका ऊर्जामन्त्री खड्कालाई एकजना सञ्चारकर्मी किशोर श्रेष्ठले बत्ती गइरहने समस्या दर्शाउँदै लोडसेडिङ तालिकाबारे प्रश्न गरे ।
यस्तो थियो सवाल-जवाफ
पत्रकार- मन्त्रीज्यू लोडसेडिङको तालिका सरकारले कहिले सार्वजनिक गर्दैछ ?
ऊर्जामन्त्री- कस्तो लोडसेडिङको तालिका ?
पत्रकार- बत्ती गएको गयै गर्छ, लोडसेडिङको तालिका कहिले सार्वजनिक गर्ने ?
ऊर्जामन्त्री- त्यो तपाईंहरूलाई लागेको होला, त्यस्तो छैन, बत्ती गएको छैन, अँ नियमित छ ।
पत्रकार- नाफामा रहेको प्राधिकरण अहिले घाटामा गयो भनेर तपाईंहरूले देखाउनु भएको छ नि ?
ऊर्जामन्त्री- तपाईं अडिटर होर तपाईं अडिटर होइन होला नि, अडिटरले निकाल्ने विषय होला नि ?
पत्रकार- तपाईंको निर्देशकले ५ अर्ब घाटामा गएको हिसाब निकाल्नु भएको छ त ।
ऊर्जामन्त्री- कसरी भयो त, त्यहाँ गएर हेर्नुस् न तपाईंहरूले…
पत्रकार- कुलमान घिसिङ हुँदा नाफामा रहेको विद्युत् प्राधिकरण तपाईंले ल्याएको निर्देशकले…
ऊर्जामन्त्री-भयो भयो जाऊँ….. (त्यसपछि कारमा चढेका मन्त्री ढोका लगाएर बाटो लाग्छन्)
