पोखरा | पोखरा महानगरपालिका-२४ हेम्जामा जुवातास खेल्दै गरेको सूचनाको आधारमा प्रहरीले छापा मारेर सात जनालाई पक्राउ गरेको छ।
जिल्ला प्रहरी कार्यालय कास्की मातहतको वडा प्रहरी कार्यालय बगरबाट खटिएको टोलीले शनिबार राति करिब १२:३० बजे हेम्जास्थित एक स्थानमा जुवा खेलिरहेको अवस्थामा खेल आयोजकसहित सात जनालाई नियन्त्रणमा लिएको हो।
पक्राउ पर्नेहरूबाट रु.७३,२०५ नगद, चार बुक तास, र अन्य जुवातास सम्बन्धी सामग्री बरामद गरिएको प्रहरीले जनाएको छ।
जिल्ला प्रहरी कार्यालय कास्कीका अनुसार, पक्राउ परेकाहरूमाथि जिल्ला प्रशासन कार्यालय कास्कीबाट सार्वजनिक हित, स्वास्थ्य, सुरक्षा, सुविधा र नैतिकता विरुद्धको कसूर अन्तर्गत म्याद थप गरी अनुसन्धान प्रक्रिया अघि बढाइएको छ।
प्रहरीले जुवा तथा सट्टेबाजी समाजमा विकृति फैलाउने कार्य भएको भन्दै यस्ता गतिविधिमा संलग्न नहुन सबैलाई आग्रह गरेको छ।
