राष्ट्रिय स्वतन्त्र पार्टी (रास्वपा) यतिबेला नेपाली राजनीतिमा निरन्तर चर्चाको केन्द्रमा छ। सुदूरपश्चिम प्रदेश सभामा पछिल्ला राजनीतिक घटनाक्रमले रास्वपाको उपस्थितिलाई थप रोचक बनाएको छ।
नेकपा माओवादी केन्द्र, नेकपा एकीकृत समाजवादी र नागरिक उन्मुक्ति पार्टीबीच प्रदेश सभामा एकता भएपछि नेपाली कम्युनिस्ट पार्टी सुदूरपश्चिमको सबैभन्दा ठूलो दल बनेको छ। यही राजनीतिक पुनर्संरचनाकै बीच, २०७९ को निर्वाचनमा एक पनि सिट नजितेको रास्वपाले चुनाव नलडी नै प्रदेश सभामा प्रवेश गरेर सबैको ध्यान तानेको छ।
स्वतन्त्र उम्मेदवारका रूपमा निर्वाचित डा. ताराप्रसाद जोशी रास्वपामा प्रवेश गरेसँगै प्रदेश सभामा पार्टीको औपचारिक उपस्थिति स्थापित भएको हो। यसअघि पुस १४ गते उज्यालो पार्टी र रास्वपाबीच भएको एकताले यो प्रक्रियालाई औपचारिकता दिएको थियो।
चुनावी परिणाम बिना नै प्रदेश सभामा प्रतिनिधित्व पाउनु रास्वपाका लागि राजनीतिक उपलब्धिमात्र होइन, सुदूरपश्चिमको राजनीतिमा नयाँ संकेतका रूपमा हेरिएको छ। निरन्तर विस्तार र अप्रत्याशित उपलब्धिमार्फत रास्वपाले आफूलाई वैकल्पिक शक्तिका रूपमा स्थापित गर्न खोजिरहेको विश्लेषकहरूको भनाइ छ।
सुदूरपश्चिमबाट सुरु भएको यो उपस्थितिले रास्वपाको राष्ट्रिय राजनीतिमा प्रभाव अझ विस्तार हुने संकेत गरेको छ।
