पोखरा। विद्या, बुद्धि, कला र संगीतकी देवी सरस्वतीको आराधनामा मनाइने सरस्वती पूजा (श्रीपञ्चमी) पोखरामा सम्पन्न भएको छ। वसन्त ऋतुको आगमनको प्रतीकका रूपमा समेत लिइने माघ शुक्ल पञ्चमीका दिन देशभर हर्षोल्लासका साथ मनाइने यस पर्वको अवसरमा पोखरा महानगरपालिका वडा नं. ४ मा अवस्थित प्रतिष्ठित शैक्षिक संस्था कुमुदिनी होम्स माध्यमिक विद्यालयमा विशेष पूजा तथा आरती कार्यक्रम आयोजना गरिएको थियो।
कार्यक्रममा विगत वर्षझैँ यसपटक पनि फेवाताल बाराही घाटका आरती टोलीका पण्डितहरू निगम उपाध्याय, परागत तिमिल्सिना, अर्जुन पौडेल र सहदेव न्यौपानेको टोलीले भक्तिमय आरती प्रस्तुत गरेका थिए। आरतीले सम्पूर्ण वातावरणलाई आध्यात्मिक र भावनात्मक बनाएको थियो।
पूजा तथा आरती कार्यक्रममा विद्यार्थी र अभिभावकहरूको उल्लेखनीय सहभागिता रहेको थियो। मन्टेश्वरी तहका विद्यार्थीहरूले सरस्वती मन्त्रोच्चारण गरेका थिए भने कक्षा ९ का विद्यार्थी आभना विश्वकर्मा र एन्जिला गुरुङले देवी सरस्वतीको महिमामाथि कविता वाचन गरी सबैको मन छोएका थिए। साथै, सरस्वती वन्दनामा आधारित नृत्य प्रस्तुतिले कार्यक्रमलाई थप आकर्षक बनाएको थियो।
अक्षरारम्भका लागि विशेष रूपमा शुभ मानिने यस दिनको अवसरमा करिब दुई दर्जन बालबालिकाहरूले अक्षरारम्भ कार्यक्रममा सहभागिता जनाएका थिए। मन्टेश्वरी इन्चार्ज अमृता आलेका अनुसार यसले बालबालिकाको शैक्षिक यात्राको सुरुआतलाई थप सार्थक बनाएको छ।
समग्रमा, कुमुदिनी होम्समा सम्पन्न सरस्वती पूजा तथा आरती कार्यक्रमले धार्मिक, सांस्कृतिक र शैक्षिक मूल्यलाई एकै साथ उजागर गर्दै उपस्थित सबैका लागि अविस्मरणीय क्षण सिर्जना गरेको थियो।
