पोखरा । पोखरामा सोमबार जीपले ठक्कर दिँदा मोटरसाइकल चालक गम्भीर घाइते भएका छन् ।
पोखराको आद्योगिक क्षेत्रमा जीपले मोटरसाइकललाई ठक्कर दिँदा मोटरसाइकल चालक पोखरा-१४ चाउथेका १८ वर्षीय गणेश लामिछाने घाइते भएको वडा प्रहरी कार्यालय रामबजारले जनाएको छ ।
चाउथेबाट अमरसिंहतर्फ आउँदै गरेको ग १ ज ६८१२ नम्बरको जीपले सोही दिशाबाट आउँदै गरेको ग ७ प ८६०४ नम्बरको मोटरसाइकललाई ठक्कर दिएको हो ।
प्रहरीले ठक्कर दिने जीप चालक बीर बहादुर परियारलाई नियन्त्रणमा लिएको छ । सोमबार राति ८ बजे सो जीपले मोटरसाइकललाई ठक्कर दिएको हो । जीप चालक परियारले मोटरसाइकललाई पछाडिबाट ठक्कर दिएर भागेका थिए ।
उनलाई अमरसिंहबाट पक्राउ गरिएको वडा प्रहरी कार्यालय रामबजारका प्रमुख दिपक के.सीले बिगखबरलाई जानकारी दिए । गम्भीर घाइते लामिछानेको मनिपाल शिक्षण अस्पतालमा उपचार भइरहेको छ ।
घट्ना बारे अनुसन्धान भैरहेको प्रहरीले जनाएको छ ।
तस्बिर-सुरज श्रेष्ठ
