पोखरा । गण्डकी प्रदेशमा सोमबार थप ९१ जनामा कोरोना भाइरस संक्रमण पुष्टि भएको छ । स्वास्थ्य निर्देशनालय गण्डकीले सोमबार जारी गरेको विज्ञप्ति अनुसार प्रदेशका ८ वटा जिल्लाका ९१ जनामा कोरोना संक्रमण देखिएको हो ।
संक्रमण पुष्टि हुनेमा कास्कीका मात्रै ४५ जना रहेका छन् । जसमध्ये पोखरा महानगरका मात्रै ४२ जना छन् भने रुपा गाउँपालिकाका २ जना र अन्नपूर्ण गाउँपालिकाका १ जना हुन् ।
यस्तै गोरखाका १२ जना, म्याग्दीका १० जना, बाग्लुङका ८ जना, स्याङ्जाका ७ जना, नवलपुरका ४ जना, मुस्ताङका ३ जना र तनहुँका २ जना रहेका छन्।
यससँगै गण्डकी प्रदेशमा कोरोना संक्रमितको संख्या १२ हजार ५८ पुगेको छ ।
यस्तै सोमबार गण्डकीमा थप ५ जना कोरोना संक्रमितको मृत्यु पुष्टि भएको छ ।
मृत्यु हुनेमा कास्कीको पोखरा महानगरका मात्रै दुई पुरुष र दुई महिला गरी ४ जना र एक जना स्याङ्जाका पुरुष रहेका छन् ।
यससँगै गण्डकी प्रदेशमा कोरोना संक्रमणबाट मृत्यु हुनेको संख्या १५९ पुगेको छ ।
पछिल्लो २४ घण्टामा प्रदेशभरबाट १६२ जना संक्रमणमुक्त भएका छन् । यो सहित गण्डकीमा कोरोना संक्रमणमुक्त हुनेको संख्या ७ हजार ७२ पुगेको छ।
हाल प्रदेशमा ४ हजार ८२७ सक्रिय संक्रमित रहेका छन् ।
गत २४ घण्टामा २७५ परिक्षण भएको र हालसम्म १ लाख ८ हजार ९६० परिक्षण भएको निर्देशनालयले जनाएको छ ।
