पोखरा। लागुऔषधसहित कास्की प्रहरीले ३ जनालाई नियन्त्रणमा लिएको छ। जिल्ला प्रहरी कास्कीका अनुससार लागुऔषधसँगै एउटा बोलेरो जीप पनि बरामद गरेको छ।
पक्राउ पर्नेमा जीपचालक पश्चिम नवलपरासीको पाल्हीनन्दन गाउँपालिका-६ का ३७ वर्षीय राजेश सैथवार, सोही जिपमा सवार पश्चिम नवलपरासीकै रामग्राम नगरपालिका-१२ बस्ने २८ वर्षीय संसद अन्सारी र सरावल गाउँपालिका-२ बस्ने २४ वर्षीय प्रेमसागर यादव रहेका रहेको कास्की प्रहरीका सूचना अधिकारी एवं डिएसपी बसन्तकुमार शर्माले जानकारी दिए।
उनका अनुसार फागुन ८ गते पोखरा महानगरपालिका-१४ खाल्टे मसिनामा लु २ च १५०९ नं. को बोलेरो जीपमा लागू औषध ओसारपसार भई रहेको भन्ने गोप्य सूचनाको आधारमा जिल्ला प्रहरी कार्यालय कास्की, लागू औषध नियन्त्रण ब्यूरो शाखा कार्यालय पोखरा र वडा प्रहरी कार्यालय रामबजार कास्कीबाट खटिएको प्रहरी टोलिले मंगलम कृषि फर्मको कम्पाउण्डभित्र पार्किङ गर्दै गरेको अवस्थामा उक्त जिप फेला पारेको थियो जीप चेकजाँच गर्दा लुकाई छिपाई राखेको डाईजेपाम २६४ एम्पुल, बुर्फिननुर्फिन २६३ एम्पुल र फेनारगन २६५ एम्पुल गरी ७९२ एम्पुल लागूऔषध भेटिएको थियो।
साथै ५ थान मोबाइल पनि बरामद भएको प्रहरीले जनाएको छ। पक्राउ परेका उनीहरुलाई कास्की जिल्ला अदालतबाट लागूऔषध सम्बन्धी मुद्दामा ७ दिनको म्याद थप गरी अनुसन्धान प्रकृया अगाडी बढाईएको प्रहरीले जनाएको छ।
