पोखरा। जेनजी आन्दोलनका कारण अनिश्चितकालका लागि स्थगित भएको गण्डकी प्रदेशसभाको बैठक कात्तिक २४ गते दिउँसो १ बजेबाट पुनः सञ्चालन हुने भएको छ। सभामुख कृष्णप्रसाद धितालले भूमि व्यवस्था, कृषि तथा सहकारी मन्त्रालयको पोखरा-५, मालेपाटनस्थित हललाई अस्थायी प्रदेशसभा भवनका रूपमा प्रयोग गर्दै बैठक आह्वान गरेका हुन्।
गत भदौ २४ गतेको आगजनी र तोडफोडबाट प्रदेशसभा र सचिवालयका भवनहरू पूर्ण रूपमा क्षतिग्रस्त भएपछि सभा सञ्चालन रोकिएको थियो। यो घटनाले गण्डकी प्रदेशको विधायिकी प्रक्रिया लामो समय स्थगित हुन पुगेको थियो। यसअघि असोज २२ गतेका लागि तय गरिएको बैठक पनि अन्तिम समयमा स्थगित भएको थियो।
प्रदेशसभाका सचिव गोविन्द पौडेलका अनुसार संसद् बैठकका लागि आन्तरिक व्यवस्थापन पूरा भइसकेको छ। “जेनजी आन्दोलनपछि उत्पन्न परिस्थितिको समीक्षा, क्षतिग्रस्त संरचनाको पुनर्निर्माण, र रोकिएका विधेयकमाथि छलफल बैठकका मुख्य एजेन्डा हुनेछन्,” पौडेलले भने।
उनका अनुसार कार्यव्यवस्था परामर्श समितिको बैठक २३ गते बसेर कार्यसूची तय गर्ने र करिब ४ दिनसम्म बैठक सञ्चालन गरी अधिवेशन अन्त्य गर्ने योजना बनाइएको छ।
महत्त्वपूर्ण विधेयकमाथि छलफल हुने
प्रदेशसभामा हाल खानी तथा खनिजसम्बन्धी विधेयक र गण्डकी विश्वविद्यालय ऐन संशोधन विधेयक विचाराधीन अवस्थामा छन्।
त्यससँगै सरकारले दर्ता गरेको औषधीय प्रयोजनका लागि गाँजा खेतीसम्बन्धी विधेयक पनि चर्चाको केन्द्रमा छ। यो विधेयकले प्रदेशको आर्थिक विकास, रोजगारी सिर्जना र स्वास्थ्य क्षेत्रको सुधारमा दूरगामी प्रभाव पार्ने अपेक्षा गरिएको छ।
जेनजी आन्दोलनले गण्डकी प्रदेशमा युवा पुस्ताको असन्तुष्टि र परिवर्तनको चाहना उजागर गरेको थियो। प्रदेशसभा बैठकको पुनः सञ्चालनले राजनीतिक स्थिरता र शासन प्रणालीको पुनः सक्रियताको संकेत दिएको राजनीतिक विश्लेषकहरू बताउँछन्।
