काठमाडौं । राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह ‘बालेन’ को नेतृत्वमा सरकार गठन भएको भोलिपल्टै मुलुकको राजनीति तरंगित बनेको छ। जेनजी आन्दोलनमा भएको भनिएको हिंसात्मक दमन प्रकरणमा पूर्वप्रधानमन्त्री केपी शर्मा ओली र पूर्वगृहमन्त्री रमेश लेखक लाई प्रहरीले पक्राउ गरेको छ।
गृहमन्त्री सुधन गुरुङ को निर्देशनमा शनिबार बिहानै भक्तपुरको गुण्डुस्थित निवासबाट एमाले अध्यक्ष ओलीलाई पक्राउ गरी काठमाडौँ जिल्ला प्रहरी परिसरमा ल्याइएको प्रहरीले जनाएको छ। पक्राउपछि उनलाई स्वास्थ्य परीक्षणका लागि महाराजगन्जस्थित त्रिवि शिक्षण अस्पताल (टिचिङ अस्पताल) लगिएको छ।
अस्पताल स्रोतका अनुसार ओलीलाई ‘रेड जोन’ को २७ नम्बर बेडमा राखिएको छ, जहाँ सामान्यतया जटिल अवस्थाका बिरामीहरूको उपचार गरिन्छ। स्वास्थ्य परीक्षणपछि उनलाई कहाँ राख्ने भन्ने विषयमा निर्णय हुने काठमाडौँ प्रहरी परिसरका प्रवक्ता एसपी पवनकुमार भट्टराईले बताएका छन्।
उता, भक्तपुरको कटुन्जेबाट पक्राउ परेका कांग्रेस नेता लेखकलाई भने महाराजगन्जस्थित प्रहरीको २ नम्बर गणमा राखिएको छ। तीनकुनेस्थित कान्तिपुर अस्पतालमा स्वास्थ्य परीक्षण गरिएपछि उनलाई त्यहाँ लगिएको हो।
यो घटनाले नयाँ सरकार गठनसँगै राजनीतिक माहोल झन् तनावग्रस्त बनेको छ। सत्ता परिवर्तनसँगै सुरु भएको कानुनी कारबाहीलाई लिएर विभिन्न राजनीतिक वृत्तमा तीव्र प्रतिक्रिया आउन थालेको छ, जसले आगामी दिनमा देशको राजनीतिक दिशालाई थप प्रभावित पार्ने देखिन्छ।
