पोखरा। जेनजी आन्दोलनको पहिलो दिन, भदौ २३ मा भएको भीषण हिंसात्मक घटनामा १९ युवाको मृत्यु भएपछि गण्डकी प्रदेशका ऊर्जा, जलस्रोत तथा खानेपानी मन्त्री फणीन्द्र देवकोटाले दिएको राजीनामा स्वीकृत भएको छ।
प्रदेश मन्त्रिपरिषद्को विहीबार साँझ बसेको बैठकमा मुख्यमन्त्री सुरेन्द्रराज पाण्डेले देवकोटाको राजीनामा स्वीकृत भएको जानकारी गराएका हुन्। गण्डकी सरकारका प्रवक्ता एवं अर्थमन्त्री डा. टकराज गुरुङले राजीनामा बुधबार नै स्वीकृत भएको पुष्टि गर्दै भने, “मन्त्रीको राजीनामा स्वीकृत गर्ने विशेष अधिकार मुख्यमन्त्रीसँग हुन्छ, त्यसका लागि मन्त्रिपरिषदको बैठक आवश्यक पर्दैन।”
राजीनामा सार्वजनिक हुनु अघि सामाजिक सञ्जालमा आएको जानकारीबारे स्पष्ट पार्दै मन्त्री गुरुङले भने, “ढोरपाटनको जिज्ञासामा हामीले सामाजिक सञ्जालबाट राजीनामाको जानकारी पाएका थियौं, तर औपचारिकरूपमा त्यो समयसम्म आएको थिएन।”
देवकोटाले केन्द्र सरकारमाथि १९ जनाको हत्या, सयौं युवाको घाइते हुनुजस्ता घटनाले आफू गहिरो मर्माहत भएको जनाउँदै मन्त्री पदबाट राजीनामा दिएका थिए। उनले घटनालाई “राज्यद्वारा युवाको दमन” को रूपमा व्याख्या गरेका थिए।
देवकोटा नेपाल समाजवादी पार्टी (नयाँ शक्ति) तर्फबाट सरकारमा सहभागी भएका थिए। उनले आफू मन्त्री बन्ने बेला माओवादी केन्द्रको चुनाव चिन्ह प्रयोग गरेर गोरखाबाट प्रदेशसभा सदस्यमा निर्वाचित भएका थिए। पार्टीले समेत उनलाई मन्त्री पदबाट फिर्ता हुन निर्देशन दिएको उनले राजीनामासँगै उल्लेख गरेका छन्।
